1. Ջրաբաշխական մամլիչ

Համաձայն Պասկալի օրենքի, հեղուկներն ու գազերն իրենց վրա գործադրվող ճնշումը միատեսակ են հաղորդում բոլոր ուղղություններով։

  

Հեղուկների այդ հատկությունը հնարավորություն ստեղծեց կառուցել տարբեր մեքենաներ, որոնց գործողությունը հիմնված է հեղուկների շարժման և հավասարակշռության օրենքների վրա: Այդ մեքենաներն անվանում են հիդրավլիկ (հունարեն հիդրո՝ ջուր և ավլոս՝ խողովակ բառերից): Դրանց թվին է պատկանում ջրաբաշխական մամլիչը: Կառուցվածքը տե՛ս նկարում.

  

  

Ջրաբաշխական մամլիչի հիմնական մասը բաղկացած է տարբեր տրամագծերով երկու

գլաններից, որոնք միացված են խողովակով, լցված են հեղուկով (ջրով կամ հանքային յուղով) և փակված գլանների պատերին կիպ հպված շարժական մխոցներով:

Ջրաբաշխական մամլիչը պարզ մեխանիզմների նման հնարավորություն է տալիս փոքր ուժով մեծ ուժ ստանալ, այսինքն, ուժի մեջ շահում ստանալ: Իրոք, եթե$S_1$մակերեսով փոքր մխոցի վրա կիրառենք դեպի ներքև ուղղված $F_1$ ուժ, ապա այդ մխոցի տակ հեղուկի ճնշումը կմեծանա $p=\frac{F_1}{S_1}$-ով։ Պասկալի  օրենքի համաձայն՝ հեղուկի ճնշումը նույնքանով կմեծանա նաև մեծ մխոցի տակ: Հետևաբար, հեղուկը մեծ մխոցի վրա կսկսի ազդել դեպի վեր ուղղված մի ուժով, որը հավասար է այդ \(p\) ճնշման և մեծ մխոցի $S_2$ մակերեսի արտադրյալին:   

 

Այդ ուժին հավասար $F_2$ ուժով էլ պետք է վերևից  ազդել մեծ մխոցի վրա, որպեսզի հեղուկը և մխոցները գտնվեն հավասարակշռության վիճակում: Այսպիսով, $F_1$ ուժին հավասարակշռող $F_2$  ուժը հավասար է.

 

Ստացված արտահայտությունը գրենք այլ կերպ՝ $\frac{F_1}{S_1}=\frac{F_2}{S_2}$

Այս հավասարության ձախ մասում $F_1$ ուժի առաջացրած ճնշումն է, իսկ աջ մասում՝ $F_2$-ի: Ուրեմն, ջրաբաշխական մամլիչի մխոցների վրա ազդող ուժերը հավասարակշռում են միմյանց, եթե նրանց առաջացրած ճնշումներն իրար հավասար են: Սա հեղուկի և մխոցների հավասարակշռության պայմանն է:

Հավասարությունը  ներկայացնենք մեկ այլ տեսքով՝ $\frac{S_2}{S_1}=\frac{F_2}{F_1}$

Ջրաբաշխական մամլիչում չենք կարող շահել աշխատանքի մեջ: Իրոք, երբ փոքր մխոցը $F_1$ ուժի ազդեցության տակ $h_1$-ով տեղափոխվում է ներքև, ձախ գլանում հեղուկի ծավալը փոքրանում է $S_1{h}_1$-ով ,  իսկ աջ գլանում՝ մեծանում $S_2{h}_2$-ով:

 

 

Քանի որ հեղուկն իր ծավալը չի փոխում (փոխում է մի այն ձևը), ապա՝ $S_1{h}_1=S_2{h}_2$

 

Ուրեմն, քանի անգամ շահում ենք ուժի մեջ, այնքան անգամ կորցնում ենք ճանապարհի մեջ: