ՀԱՐՍՏԱՑՐՈՒ ԳԻՏԵԼԻՔՆԵՐԻԴ ՊԱՇԱՐԸ
Ակտիվացրու «Իմ+»-ը գերազանց գնահատականներ ստանալու համար
Ստեղծեք Ձեր ուսումնական ծրագիրը «ԻմԴպրոց» կայքում
Ստացեք հաշվետվություն Ձեր ուսումնական ծրագիր արդյունավետության վերաբերյալ
Օգտագործեք Ձեր առաջադրանքները ստուգողական աշխատանքներում

Տեսություն

Ճշմարիտ բարեկամը
Մի անգամ Հիսուսին մոտեցավ մի երիտասարդ և հարցրեց, թե ինչ պետք է անել՝ արժանանալու համար Աստծո սիրուն: Հիսուսը պատասխանեց, որ պետք է ամբողջ հոգով, սրտով և մտքով սիրել Աստծուն, ինչպես նաև պետք է սիրել ընկերոջը, ինչպես սեփական անձը: Ի պատասխան հարցին, թե ինչպես հասկանալ՝ ով է ընկեր, Հիսուսը պատմեց բարի սամարացու մասին հետևյալ առակը:
 
jesus-multitude-mormon.jpg

Մի հրեա մարդ Երուսաղեմից գնում է Երիքով քաղաք: Ճանապարհին նրա վրա ավազակներ են հարձակվում, վնասվածքներ հասցնում, կողոպտում և, ծանր վիճակում թողնելով, փախչում:
Պատահաբար այդ ճանապարհով մի հրեա քահանա է անցնում, բայց տեսնելով վիրավորին՝ փոխում է ճանապարհը: Ապա անցնում է մի հրեա պաշտոնյա, որ թեև մոտենում է վիրավորին, բայց, այնուամենայնիվ, խուսափում է օգնել նրան և հեռանում է:
Հետո մի օտարական է անցնում Սամարիայից: Տեսնելով վիրավորին՝ անմիջապես մոտենում է նրան, կապում վերքերը, տանում հյուրանոց: Այսպես մի ամբողջ օր խնամում է նրան, իսկ հաջորդ օրը մեկնելիս հյուրանոցի տիրոջը գումար է տալիս, որպեսզի նա շարունակի խնամել վիրավորին:
 
good-samaritan.jpg

Այս առակով Հիսուսը սովորեցնում է բարի, ուշադիր և հոգատար լինել բոլորի նկատմամբ, ինչպես նաև ցույց է տալիս, թե ով է ճշմարիտ և իրական բարեկամը: Ճանապարհորդը, որ հրեա քահանային և պաշտոնյային համարում էր իր բարեկամը, նրանց կողմից անտեսվեց: Այն ինչ սամարացին, որ այլազգի էր, դրսևորեց իրեն որպես իրական ընկեր և բարեկամ:  
Մոլորյալ որդու վերադարձը
Մի հարուստ մարդ ունենում է երկու որդի: Կրտսեր որդին հորից պահանջում է իր բաժին ժառանգությունը, որպեսզի գնա ուրիշ երկրներ: Հայրը ստիպված բաժանում է ունեցվածքը երկու որդիների միջև: Ավագ որդին մնում է հոր մոտ, իսկ կրտսերը հեռանում է: Վերջինս օտար երկրներում շատ ընկերներ է գտնում, որոնց հետ տրվում է տարբեր զվարճանքների և վատնում ունեցվածքը: Երբ դրամները վերջանում են, բոլորը լքում են նրան:
 
Տղան ստիպված է լինում աշխատանքի անցնել մի ագարակատիրոջ մոտ՝ որպես խոզապահ: Լինում էին օրեր, երբ ընդհանրապես ուտելիք չէր ունենում, անգամ իրավունք չէր ունենում խոզերի կերից ուտելու: Նա կարոտով էր հիշում իրենց տունը, բարի հորն ու եղբորը, նույնիսկ ծառաներին, ովքեր ապրում են հանգիստ և ապահով կյանքով:
 
Տղան զղջում է իր գործած սխալների համար ու թեև հասկանում է, որ դրանք աններելի են, ճամփա է ընկնում դեպի հայրենի տուն՝ ներում խնդրելու:
 
Մոլորյալ (անառակ) որդու հագուստները չնայած պատառոտված էին, ինքն էլ շատ փոխված, ծերունի հայրը միանգամից ճանաչում է զավակին և ընդառաջ վազելով ՝ գրկում նրան
 
og_anarak-ordu-veradardzy-4945.jpg
 
Հայրը ծառաներին պատվիրում է որդուն ընտիր հագուստներ հագցնել և մատին մատանի դնել: Ապա մեծ խնջույք են կազմակերպում:
Երեկոյան, երբ դաշտից տուն է վերադառնում ավագ եղբայրը, ծառաներին հարցնում է, թե ինչ խնջույք է, և ծառաները նրան հայտնում են եղբոր վերադարձի մասին:
Մեծ եղբայրը ուրախանալու փոխարեն բարկանում է և որոշում ներս չմտնել: Հայրը, իմանալով այդ մասին, դուրս է գալիս և խնդրում ավագ որդուն միանալ իրենց ուրախությանը:
 
Որդին կշտամբում է հորը՝ ասելով, որ այսքան տարի հավատարիմ է եղել նրան, սակայն դրա դիմաց հայրն անգամ մեկ ուլ չի մորթել իր համար, իսկ եղբայրը, որ հեռացել էր, վատնել ողջ ունեցվածքը, արժանանում է նման ճոխ ընդունելության: Հայրը բացատրում է, որ ի տարբերություն ավագ որդու, որ միշտ իր մոտ էր, ապրում էր հարուստ և բարեկեցիկ կյանքով, կրտսեր որդին շեղվել էր ճիշտ ճանապարհից և կորստյան մատնվել, սակայն այժմ հասկացել էր սխալները, զղջացել և վերադարձել տուն: Իսկ զղջացողին պետք է ներել և ուրախությամբ ընդունել:
Բառարան
Սամարիա - քաղաք Միջերկրական ծովի արևելյան ափին
 
Վատնել - զուր տեղը ծախսել
 
Զրկանք - տառապանք
 
Մոլորյալ - ճիշտ ճանապարհից շեղված
Աղբյուրները
Հայոց եկեղեցու պատմություն: Դասագիրք հանրակրթական դպրոցի 5-րդ դասարանի համար/ Վ. Ղանդիլյան, Վ. Պարսամյան, Ա. Ղուկասյան, Ա. Գուլբուդաղյան,; ՀՀ ԿԳՆ,- Եր.: Տիգրան Մեծ, 2014, էջ 72-77
https://upload.wikimedia.org/wikipedia/commons/thumb/9/96/Bloch-SermonOnTheMount.jpg/1200px-Bloch-SermonOnTheMount.jpg
http://surbzoravor.am/images/post/2016-02/og_anarak-ordu-veradardzy-4945.jpg
https://stephenliddell.files.wordpress.com/2014/01/good-samaritan.jpg