1. Գազի խտություն

Նյութի խտությունը որոշակի քանակով նրա զանգվածի և ծավալի հարաբերությունն է, որը հաշվում են ֆիզիկայի դասընթացից ձեզ արդեն հայտնի հետևյալ բանաձևով`

$p=\frac{m}{V}$, որտեղ համարիչում նյութի զանգվածն է, իսկ հայտարարում՝ նյութի ծավալը:

 

Միավորների միջազգային համակարգում նյութի խտության չափման միավորը \(կգ/մ³\)  է, սակայն քիմիայի դասընթացում նպատակահարմար է այլ միավորների կիրառումը.              

պինդ նյութերի դեպքում՝ \(գ/սմ³\), hեղուկների դեպքում՝ \(գ/մլ\), իսկ գազային նյութերի դեպքում՝ \(գ/դմ³\), կամ՝ \(գ/լ\ \): 

 

Ավոգադրոյի օրենքից բխում է, որ գազի խտությունը (գ/լ) կարելի է հաշվել ըստ  $\mathrm{\rho }=\frac{M}{V_m}$ բանաձևի, որտեղ համարիչում տվյալ գազի մոլային զանգվածն է (գ/մոլ), իսկ հայտարարում

գազի մոլային ծավալն է, որը բոլոր գազերի համար նույն արժեքն ունի. նորմալ պայմաններում  այն հավասար է \(22,4\) լ/մոլ:

 

Եթե հայտնի է հետազոտվող գազի խտությունը, ապա կարող ենք հաշվել նրա մոլային զանգվածն ըստ հետևյալ բանաձևի՝ $M=p\cdot V_m$ 

Խտության բանաձևից հետևում է նաև, որ տարբեր գազերի խտությունները հարաբերում են իրար այնպես, ինչպես նրանց մոլային զանգվածները` $\frac{p_1}{p_2}=\frac{M_1}{M_2}$ 

 

Եթե  $p_1=p_2$, ապա՝  $M_1=M_2$, իսկ եթե $p_1⟨p_2$, ապա՝  $M_1⟨M_2$, այլ կերպ ասում են՝  առաջին գազը թեթև է երկրորդ գազից և հակառակը: